Sa tagsa ka bulan sang Enero sa Pilipinas, ginasaulog ang debosyon sa imahen sang Santo Niño sa madamu nga mga Parokya kag Diosesis sa pungsod. Sa bug-os nga kalibutan, may yara lang sang apat ka mga Kristolohiko nga Laragway sang Lapsag nga si Jesus ukon Child Jesus ang Kanonikal nga Ginkoronahan.
Ini amo ang Santo Bambino sang Aracoeli sa Italya, Santo Bambino sang Arenzano sa Italya, Lapsag nga si Jesus sang Prague sa Czech Republic, kag ang aton nga Santo Niño sang Cebu. Apesar nga isa lang ang Kaninikal nga Ginkoronahan nga Infant Jesus sa Pilipinas, may yara naman sang apat ka mga dumaan nga imahen sini.
Una nga nakadangat sa Pilipinas kag pinakadumaan amo ang Santo Niño de Cebu nga gindala bilang regalo sang ekspedisyon sang Espanya sa idalum ni Kapitan-Heneral Ferdinand Magellan sadtong 1521 sa sadto anay pamuno sang Cebu nga amo si Raja Humabon kag ang tiayon sini nga si Hara Amihan ukon Humanay. Ginhalad bilang regalo ni Magellan sa kay Hara Amihan ang amo nga imahen sa pagpabawtiso sa Kristyanismo sang hara.
Ikaduha nga labing-dumaan amo ang Santo Niño de Tondo nga nag-abut sa Tondo sadtong tuig 1572 bitbit naman sang ekspedisyon sang Alentado nga si Miguel Lopez de Legaspi nga amo ang nagtukod sang Manila. Naggikan ang amo nga imahen sa Acapulco sa Mexico kag ginabana-bana nga nakalibut pa sa Bohol kag sa Panay upod ang hubon ni Legaspi antes ini ginpahamtang sa Tondo.
Ikatlo sa labing-una nga imahen sang Lapsag nga si Jesus amo ang Santo Niño de Arevalo sa Ciudad sang Iloilo nga gindala sang Katsila nga Governador-Heneral nga si Gonzalo Ronquillo de Peñalosa sadtung 1581 sa La Villa Rica de Arevalo nga anay ngalan sang karon Distrito sang Arevalo.
May isa pa ka ginasiling labing-dumaan nga imahen sang Lapsag nga si Jesus nga gindala sa misyon sang Tacloban, Leyte sadtong 1770 apang wala sang mga nahawiran nga mga nasulat nga pamatuod agud magpat-ud sini.
Sa tagsa ka ikatlo nga Domingo sang Enero ginahiwat ang Dinagyang Festival nga nagasaulog sang pag-abut sang replika sang Santo Niño de Cebu sa ciudad sang Iloilo sadtung tuig 1968. Ang ini nga pagsaulog naga-angut sa debosyon sa Santo Niño de Cebu kag indi napatumod sa imahen nga yara sa Distrito sang Arevalo.
Sa Probinsya sang Cebu, ginapatigayon ang Sinulog Festival bilang ritwal nga saot kag pangamuyo nga nagapasidungug sa kay Señor Santo Niño. Nagatumod ang tinaga nga Sinulog sa ‘sulog’ sang tubi ukon current nga gina-simbolo naman sang pa-atras kag abante nga mga tikang sang saot kaangay sang tubi.
May kaangay man sa sini nga mga ginapatigayon nga kafiestahan sa madamu nga bahin sang Pilipinas kag bisan pa sa probinsya sang Negros apang ang mga ini bilang pagsunod na gid lang sa bantug nga ka-piestahan nga ginahiwat sa Cebu kag sa Iloilo kag wala man sang hayag nga kaangtanan sa maragtas sang mga duog nga ini sa Negros.
Nagalibut sa relihiyoso nga debosyon ang ginhalinan sining mga pagsaulog sang mga kafiestahan nga napatuhoy sa kay Señor Santo Niño. Padayon kuntani naton nga dumdumon ang kabangdanan sang ginasaulog kag hatagan sang nagakaigo nga bili kag pagtahud kag indi malubong sa matunog nga linagabong kag linagumba sang mga sonata upod sang pagsinaot kag dinagyang sa mga dalanon nga puno sang karnal nga pagkinalipay nga wala man sing kaangtanan sa matuod-tuod nga kahulugan sang ginapasidunggan nga debosyon. ||
