Nangin puno sang kadalag-an ang bulan sang Pebrero para sa aton mga nagapangabudlay sa bahin sang pagwaragwag kag taliambong. Ini bangud ang bulan nga ginatawag Dagangkahoy sang mga katigulangan sadto nangin saksi sang duha ka mga dalagku nga hitabu sa lokal nga entablado sang katilingban sining aton karon nga panag-on.
Bulan sang Pebrero tuig 2012 sang una nga ginsaulog ang Pangkalibutanon nga Adlaw sang Radyo nga ginpangunahan sang UNESCO ukon United Nations Educational, Scientific, and Cultural Organization. Bulan man sang Pebrero ginasaulog ang Pungsudnon nga Bulan sang Taliambong suno sa Proclamation No. 683 nga ginpirmahan ni anay Pangulo Corazon C. Aquino sadtung tuin 1991.
Sa bahin sang probinsya sang Negros Occidental, ginasaulog gid ang duha ka mga dalagku nga kahiwatan sa amo nga bulan.
Sa pagkamatuod, sa ciudad sang Bacolod lang una nga ginsaulog ang Pangkalibutanon nga Adlaw sang Radyo sa Pilipinas nga ginasakdag sang ordinansa mismo sang ciudad. Ini amo ang City Ordinance nga may numero 08-14-792 sang tuig 2014 nga gindihon ni anay konsehal kag tagwaragwag nga si Alex Paglumotan.
Sa pito ka tuig na nga ginasaulog sa ciudad ang kahiwatan nga nagahatag sang daku nga bili sa industriya sang pagwaragwag, madamu na sang mga ginpalangga kag gin-idolo nga mga tingog kag personalidad sang radyo sa Negros ang ginhatagan sang pagpasidungog paagi sa Tingog kag Handurawan Awards, nga karon yara na iya ikan-um nga tuig.
Nangin mapalaron kita nga nangin kabahin sang pagdihon sang Tingog kag Handurawan Awards sumugod pa sang una niya nga tuig. Sa aton pagpanalawsaw sadto sang ginabalay pa lamang ang sadsaran sang amo nga padya, aton natukiban nga sa mga tuig 1956 ukon 1957 sang una nga nagpalayag ang waragwagan nga DyRL, nga amo sa karon ang ginakilala nga labing una kag padayon pa nga nagawaragwag nga istasyon sang radyo sa probinsya.
Upud sa sini nga pagtukib ang paghangup nga malawig na gid matuod ang ginusoy nga banas sang radyo sa isla sang Negros, apang nagapabilin nga yara gid lamang sa likod sang kabantugan sang mga palatuntunan kag ngalan sang waragwagan ang mga tawo nga tagpangabudlay sa tanan nga nalab-ut sang industriya sang radyo. Hayag man sa aton tanan nga ang matuod nga nagahatag kabuhi sa serbisyo publiko, kalingawan, kag pagdul-ong sang mga balita sang tagsa ka waragwagan amo ang mga tawo sa likod sini, apang malawig kita nga nangin mahipus sa paghatag sang pagpasidungog.
Aton nahibaluan nga may yara sadto nga isa man ka pagpasidungog sa mga yara sa broadcast industry apang nangin malip-ot lang ini kag tigayon na nga nag-untat matapus ang pila lang ka tuig.
Malahalon ining pagpasidungog indi lamang sa bugal sang isa ka tawo, kondi labi sa tanan, sa pagtib-ong sang mga maayo kag angay sulundon nga mga buhat sa industriya sang pagwaragwag kag ang pagpaisug sang buot sang mga nagapangabudlay sa radyo nga magpadayon – sa pihak sang mga kabudlayan kag pagpanghangkat. Panginbulahan sa tanan nga tagdaug sa sini nga tuig sang Tingog kag Handurawan Awards!
Sa pihak nga bahin, sa pagtakup man sang Bulan sang Taliambong, ang Hubon Buglasanon nagpatigayon sang pagpasundayag sang mga binalaybay kag pagpandong sa mga bag-o nga katapu sini sadtong Pebrero 26, sa The Negros Museum. Ang Hubon Buglasanon katilingban sang mga manunulat kag mamalaybay sa pulong nga Hiligaynon sa Negros Nakatundan.
Tuig 2018 sang una ini nga gintukod sang mga mamalaybay kag manunulat sa Hiligaynon nga yara sa patag sang media, entablado, nagatrabaho sa pagpalambo sang ihibalo tuhoy sa kultura, kag lakip man ang mga freelance nga mga manunulat. Nangin kabahin kita sa una nga katapu kag nagtukod sini nga ang katuyuan amo ang pagpalambo, pagtuon, pagpalapnag, kag pagpanalawsaw sang kinaalam tuhoy sa pulong Hiligaynon.
Paagi sa ginpatigayon nga pagpandong sang mga bag-o nga katapu, ginasigahum sang Hubon Buglasanon nga magapagsik pa gid ang mga buluhaton sang Hubon nga mapuslanon indi lamang para sa mga manunuon sang pulong Hiligaynon, kondi subong man sa bug-os nga katilingban.
Aton ginaabi-abi sa Hubon Buglasanon kanday Sir Francis Moya, Doc Rogie Bacosa, Sir Rudy Reveche, Julie Ann Gonzales, Kimberly Caspe, Daygie Mae Bayking-Solanoy, kag John Rovic G. Solanoy – padayon nga itib-ong ang bugal sang matam-is nga pulong Hiligaynon!
